భయపడి జాగ్రత్తపడదాం...

అప్పట్లో ఓ సినిమా కోసం "భయపడడం లోనే పడడం ఉంది మనం భయపడద్దు" అని త్రివిక్రమ్ గారు రాశారు కానీ అది ఆ సందర్భానికి మాత్రమే సూటవుతుంది. అలా అంటే జాగ్రత్తపడడంలో కూడా పడడం ఉందని వదిలేయలేం కదా. అందుకే భయపడి జాగ్రత్తపడదాం డూడ్ దాని వలన పోయేదేం లేక పోగా మనం మన చుట్టుపక్కల ఉన్న వాళ్ళతో సహా ఆరోగ్యంగా ఉంటాం.  

కరోనా సెకండ్ వేవ్ చాలా ఉధృతంగా ఉంది పత్రికల భాషలో చెప్పాలంటే కోరలు చాచి ప్రజలపై విరుచుకు పడుతుంది. పరిస్థితి ఆల్రెడీ మన చేతుల్లోనుండి జారిపోయేలా ఉంది, కొన్ని రాష్ట్రాల్లో ఆల్రెడీ జారిపోయింది. ఇపుడు మనం చేయగలిగిందల్లా జాగ్రత్తపడడమే. 

గత సంవత్సరం ఇదే సమయానికి లాక్ డౌన్ లో ఎంత అప్రమత్తంగా ఉన్నామో ఇపుడూ స్వచ్ఛందంగా అలా జాగ్రత్తలు తీస్కోవాల్సిన సమయం ఇది. నిజానికి అంతకన్నా ఎక్కువ జాగ్రత్తలు తీసుకోవాలి. ఎంతో అవసరమైతే తప్ప బయటికి రావద్దు. ఇంటికి తెచ్చుకునే ప్రతీదీ శానిటైజ్ చేస్తూ రూల్స్ పాటిద్దాం. స్వచ్ఛందంగా లాక్ డౌన్ సెల్ఫ్ ఐసోలేషన్ పాటిద్దాం. 

పండగలు పబ్బాలు ప్రతిఏడాదీ వస్తాయి. మల్లెపూలైనా, పనసతొనలైనా, మామిడి పళ్ళైనా, తాటి ముంజలైనా ప్రతీ వేసవి కాలంలోనూ వచ్చేవే మనిషి ప్రాణంకన్నా ఇవేవీ విలువైనవి కావు. ముందు బ్రతికుంటే మళ్ళా మళ్ళా ప్రతి ఏడూ ఎంజాయ్ చేయచ్చు కనుక మిత్రులందరూ జాగ్రత్తగా ఉండండి. 

ఆ వచ్చాక మందులేస్కోవచ్చు అనో మనకేంటీ డబ్బులున్నాయ్ ఇన్సూరెన్స్ లు ఉన్నాయ్ ఎలాగో ట్రీట్మెంట్ తీస్కోవచ్చు అనో నిర్లక్ష్యం చేయద్దు. అందరం అప్రమత్తంగా ఉండి అసలు ఆ అవసరం రానివ్వకుండా జాగ్రత్త పడి మెడికల్ సిస్టం మీద లోడ్ తగ్గిద్దాం. ఇప్పటికే చాలా హాస్పిటల్స్ లో బెడ్స్ కరువై ట్రీట్మెంట్ కరువై ఏం చేయాలో అర్ధం కాని పరిస్తితుల్లో ఉన్నవారి హృదయవిదారక కథలు వింటూనే ఉన్నాం. ముందు జాగ్రత్త ఒకటే దీనిని కట్టడి చేయడం లేదా నివారించగలిగే మార్గం. 

అలాగే "వ్యాక్సీన్ వచ్చింది కదా ఇంకెక్కడి కరోనా" అనే మాటలని ఎవరు చెప్పినా నమ్మకండి. మనకి దొరికింది వ్యాక్సీన్ మాత్రమే అతీంద్రియ శక్తుల మంత్రదండం కాదు. ఇది ఓ తాత్కాలిక ఉపశమనం మాత్రమె అది వేయించుకున్నా కొన్ని సార్లు మనకీ రావచ్చు లేదా వైరస్ వాహకాలుగా వ్యవహరించి మనింట్లోనే మనకి తెలియకుండా మనం మన ఆత్మీయులకి ఇతరులకి అంటిస్తూ ఉండచ్చు. 

కనుక అప్రమత్తంగా ఉంటూ, సోషల్ డిస్టెన్స్ పాటిస్తూ, మాస్కులు ధరిస్తూ, అనవసరంగా చేసే విహారాలని అరికడుతూ, శానిటైజేషన్ అండ్ శుభ్రతని నూటికి రెండొందల శాతం పాటిస్తూ కరోనా వ్యప్తిని అరికడదాం. దిస్ టూ షల్ పాస్. ఓపిక గా ఎదురు చూద్దాం.

సెకండ్ వేవ్ సిప్టమ్స్ అంటూ కొన్ని లక్షణాలు అదనంగా సర్క్యులేట్ అవుతున్నాయి. వీటి అథెంటిసిటీ గురించి నాకు తెలియదు కానీ అప్రమత్తంగా ఉండడం మంచిదే. ఆ వివరాలు టైంస్ ఆఫ్ ఇండియా ఆర్టికల్ లో ఇక్కడ క్లిక్ చేసి చూడండి. వీటిలో కొన్ని కళ్ళు పింక్ కలర్ కి మారడం, ఊపిరాడకపోవడం, స్టమక్ అప్సెట్, మానసిక అస్థిరత, గుండె వేగంగా కొట్తుకోవడం లాంటివి ఉన్నాయ్.  

కరోనా గురించి పొయినేడాది నేను పంచుకున్న సమగ్రమైన సమాచారం ఈ పోస్ట్ లో ఇక్కడ లింక్ పై క్లిక్ చేసి చూడవచ్చు.

మొత్తం చదవండి

వకీల్ సాబ్ - డైలాగ్స్...

పవన్ కళ్యాణ్ పవర్ పాక్డ్ పెర్ఫార్మెన్స్ తో బ్లాక్ బస్టర్ గా నడుస్తున్న తన కొత్త సినిమా వకీల్ సాబ్ ఈ పాటికే అందరూ చూసే ఉంటారు. లేకుంటే కనుక చూసేయండి. ఈ సినిమా గురించి నా అభిప్రాయం ఇక్కడ చదవవచ్చు. ఓ మంచి సినిమా చూశామనే అనుభూతి కోసం, మహిళల పట్ల దృక్పధాన్ని సరిదిద్దుకోవడం కోసం ప్రతి ఒక్కరూ చూసి తీరవలసిన సినిమా వకీల్ సాబ్. 

ఈ సినిమా విడుదలై విజయవంతంగా నడుస్తూ వారం గడిచింది కనుక స్పాయిలర్స్ అయినా నాకు నచ్చిన కొన్ని సంభాషణలు ఇక్కడ పొందు పరుస్తున్నాను. ఇంకా సినిమా చూడని వారు దయచేసి సినిమా చూసిన తర్వాత చదవగలరు. 

"రాముడు అయోధ్యలో ఉన్నా అడవిలో ఉన్నా ఆనందంగానే ఉంటాడు. కానీ చూడ్డానికి భక్తుల మనసుకే కష్టంగా ఉంటుంది."

"అడుక్కుంటే అన్నం దొరుకుతుంది కష్టపడితే నీడ దొరుకుతుంది కానీ ఏం చేసినా సామాన్యులకి న్యాయం మాత్రం దొరకడం లేదు."

"కాళ్ళ క్రింద యాక్సిలేటర్ ఉంది కదా అని తొక్కితే రూల్సే కాదు బోన్స్ కూడా బ్రేక్ అవుతాయి."  

"ఆడవాళ్ళు మనకు ఆనందాన్ని మాత్రమే ఇవ్వాలి, హక్కుల గురించి అడిగితే.. ఇలా బోన్ లో నిలబెట్టి వేశ్య అని ముద్ర వేస్తాం. ఇదేం న్యాయం ?"

"ఆడది అంటే వాడి బాత్ రూం గోడమీద బొమ్మ కాదు వాడిని కనిపెంచిన అమ్మ కూడా." 

"చీడ పురుగులు మగవాళ్ళ తలలో పెట్టుకుని మందు ఆడవాళ్ళ మీద కొడితే ఎలా." 

"ఓటమి అంటే అవమానం కాదు, మనల్ని మనం తెలుసుకునే గొప్ప అవకాశం." 

"మద్యం తాగడం హానికరం ఆడవాళ్ళకైనా మగవాళ్ళకైనా. మగవాళ్ళు తాగితే పడిపోతారు ఆడవాళ్ళు తాగితే పడుకుంటారు అనుకోవద్దు." 

"ఒక మనిషికి ఉన్న అలవాట్లను బట్టి క్యారెక్టర్ ని ఎలా డిసైడ్ చేస్తాం." 

"మన ఇంట్లో ఉండే గడియారంలో చిన్న ముల్లు కూడా అమ్మాయి క్యారెక్టర్ ని డిసైడ్ చేస్తుంది." 

"రాత్రి పూట ఓ అమ్మాయి ఒంటరిగా వెళ్తే బైకులూ, కార్లు ఆటోలు అన్నీ స్లోడౌన్ అవుతాయ్. సైడ్ విండోలు కిందకి దిగుతాయ్, జిరాఫీల్లా తలలు పొడుచుకొస్తాయి.. చూపులు సూదులవుతాయి.." 

"అబ్బాయిలు బయటకొస్తే సరదా.. అమ్మాయిలు బయటకొస్తే మాత్రం తేడా!"

"అమ్మాయిలు మనస్ఫూర్తిగా అబ్బాయితో నవ్వుతూ మాట్లడకూడదు, మాట్లాడేప్పుడు అసలు టచ్ చేయకూడదు, హింట్ ఇచ్చేసింది సిగ్నల్ ఇస్తుంది అని ఫీలైపోతారు. ఇదేం న్యాయం." 

"అబ్బాయిలు నవ్వుతూ మాట్లాడితే కమ్యునికేషన్ ఆడబిడ్డలు నవ్వుతూ మాట్లాడితే కొంపలు కూల్చే క్యారెక్టర్."

"నవ్వడమనే ఒక సహజ ప్రవర్తన కూడా ఒక అమ్మాయి క్యారెక్టర్ ని డిసైడ్ చేస్తుంది బరితెగించిన క్యారెక్టర్ అని ముద్ర వేస్తుంది."  

"అమ్మాయి ఒంటరిగా అబ్బాయిలతో ఎక్కడికీ వెళ్ళకూడదు, వెళ్తే దేనికైనా రెడీ అని ఊహించుకుంటారు, తనని ఆ అబ్బాయి ముట్టుకోడానికి, పట్టుకోడానికి బ్లాంకెట్ పర్మిషన్ ఇచ్చేసింది అని ఫిక్సయిపోతారు."  

"అమ్మాయికి ఇష్టం లేకుండా ముట్టుకునే హక్కు ఏ మగాడికీ లేదు. ముట్టుకోవద్దంటే ముట్టుకోవద్దు. ఫ్రెండ్ అయినా, బోయ్ ఫ్రెండ్ అయినా, మొగుడైనా ఏ మగాడైనా." 

"ఆశతో ఉన్నోడికి గెలుపు ఓటములు ఉంటాయి. ఆశయంతో ఉన్నోడికి కేవలం ప్రయాణం మాత్రమే ఉంటుంది." 

"నిజం ఎప్పుడూ ఒంటరిదే కానీ దాని బలం ముందు ఎవరైనా తలొగ్గాల్సిందే." 

"నువ్వు గెలుపుకోసం వచ్చావు.. నేను న్యాయం కోసం వచ్చాను. నీది స్వార్ధం నాది ధర్మం." 

"వాళ్ళు సామాన్యులు నీలాంటోడు పెడతా అంటే ఆశపడ్తారు బెదిరిస్తే భయపడతారు. ఆశకీ భయానికి మధ్య ఊగిసలాడే జీవితాలు వాళ్ళవి." 

"కోర్టులో వాదించడమూ తెలుసు. కోటు తీసి కొట్టడమూ తెలుసు." 

"జనం కోసమే ప్రాణం ఇచ్చేవాడు. తనే ప్రాణం అనుకుని వచ్చిన దాన్ని నన్నింక ఎంత బాగా చూసుకుంటాడు."

"బలహీనంగా ఉన్నదాని గురించి బలంగా నిలబడతాడు. తనకి ఏది ఉందో అందరికీ అదే ఉండాలి అనుకుంటాడు." 

"ఆయన ఒక మాటన్నాడంటే దానికో విలువుంటుంది. ఏదన్నా జేసిండంటే అందరికీ ఉపయోగం ఉంటది." 

"ఒకప్పుడు ఊళ్ళకోసం రోడ్లేసేటోళ్ళు ఇపుడు రోడ్లకోసం ఊళ్ళే ఖాళీ చేయిస్తున్నారు." 

"మనిషి బతికేది ఆశతో.. ఆ ఆశే సచ్చినాక మనిషికి చావే సుఖమనిపిస్తుంది." 

"ఆవేశంతో చేస్తే కొందరికే న్యాయం చేయగలం అదే ఆలోచనతో చేస్తే అందరికీ న్యాయం చేయగలం."

"మీరు జనం కోసం చాలా కోల్పోయారు. కానీ మీరు దూరమై జనాలు జీవితాల్నే కోల్పోతున్నారు, మీ మౌనం సమాన్యులకు శాపం కాకూడదు."   

"ఎన్నాళ్ళైనా ఎన్నేళ్ళైనా నాలో ఆవేశం తగ్గదు ఆశయం మారదు. నల్లకోటు వేస్కున్నానంటే వేస్కోటనికి పిటీషన్లు తీస్కోటానికి బెయిళ్ళు ఉండవు."

మొత్తం చదవండి

వకీల్ సాబ్...

ఈ పోస్ట్ ని నా స్వరంలో ఈ యూట్యూబ్ వీడియోగా ఇక్కడ వినవచ్చు. For those of you who can't read Telugu but can understand. You can listen to this post in my voice on YouTube at this link. 

పింక్ మంచి సినిమా అనేది నో డౌట్. టు ది పాయింట్ ఎక్కడా డీవియేట్ అవకుండా అమితాబ్ చక్కని "సపోర్టింగ్" రోల్ తో తాను చెప్పాలనుకున్న సందేశాన్ని సూటిగా ప్రేక్షకుల మనసుల్లో నాటుతారు. ఐతే పింక్ పూర్తిగా మల్టీప్లెక్స్ సినిమా. క్రిటికల్ అప్లాజ్ వచ్చినా, హిట్టయినా ఆ సినిమా ఎంతమంది తెలుగు ప్రేక్షకులు చూశారూ అనేది నాకు సందేహమే. 

ఒక వేళ చూసినా సోషల్ మీడియాలో యాక్టివ్ గా ఉండే ఎలీట్/మల్టీప్లెక్స్ క్రౌడ్ మాత్రమే చూసుంటారు. అలాంటి కథకు కొంత మాస్ అప్పీల్ యాడ్ చేసి యూత్ లో విపరీతమైన క్రేజ్ ఉన్న పవన్ కళ్యాణ్ లాంటి నటుడితో తీస్తే మరింతమంది యువతకి ఈ సందేశం చేరువయ్యే అవకాశం ఉంది. అలాంటి ఓ చక్కని షుగర్ కోటెడ్ పిల్ నిన్న విడుదలైన వకీల్ సాబ్. ఈ పిల్ ప్రస్తుత యువతకి చాలా అవసరం. 

దిల్ రాజు లాంటి నిర్మాత దగ్గర రచయితలకు, దర్శకులకూ కొదవ లేదు. పూర్తి కమర్షియల్ ఎలిమెంట్స్ తో ఓ కొత్త కథ రాసుకుని చేసినా ఇదే రెంజ్ లోనో ఇంతకు మించో కలెక్షన్స్ వస్తాయి నో డౌట్. కానీ ఈ కథ చెప్పాలి అదీ పవర్ స్టార్ లాంటి యూత్ ఫాలోయింగ్ ఉన్న హీరో ద్వారా చెప్తే ఈ మెసేజ్ ఎక్కువ మందికి బలంగా రీచ్ అవుతుంది అని నమ్మి సినిమా తీయడం మెచ్చుకోవలసిన విషయం. 

ముఖ్యంగా యువతలో అద్భుతమైన ఫాలోయింగ్ ఉన్న పవన్ ద్వారా "ఎవరైనా సరే ఓ అమ్మాయి నన్ను తాకొద్దు అంటే తాకవద్దు అని అంతే.. అందులో ఏవిధమైన డిస్కషన్స్ కి తావులేదు.." అని స్పష్టంగా చెప్పించడం చాలా బాగుంది. అలాగే ఒకవేళ అవాంఛనీయమైన సంఘటన జరిగినా పారిపోవద్దు, దాక్కోవద్దు, పోరాడు, ఎదురు తిరుగు అని అమ్మాయిలకి చెప్పడం ఇంకా బావుంది. తనని ఫాలో అయ్యే యువత ఈ విషయం అర్ధం చేసుకుని ఆచరణలో పెడితే ఖచ్చితంగా తెలుగు రాష్ట్రాలలో మహిళల భద్రత మరింత పెరుగుతుంది. 

ఇక ఈ సినిమాలో తెలుగు ప్రేక్షకులకోసం చేసిన మార్పులు చాలా బాలెన్స్డ్ గా చక్కగా చేశారనిపించింది నాకు. ఐటమ్ సాంగ్స్, వెకిలి కామెడీ, తాగుబోతు సిట్టింగులు లాంటి ఎలిమెంట్స్ జోలికి పోలేదు. మూడేళ్ళ గ్యాప్ తర్వాత వెండితెరమీద చూసుకోబోతున్న తమ హీరోని ఖచ్చితంగా కాస్త ఎక్కువ సేపు చూడాలని కోరుకుంటారు తన ఫాన్స్. దానికి తగినట్లే ఫ్యాన్స్ కి కిక్ ఇచ్చేలా పవన్ కి కొన్ని సీన్స్ ని కలిపారు తప్ప అసలు కథను ఏమాత్రం చెడగొట్టలేదు. ఆ కలిపిన సీన్స్ ఏ పర్పస్ తో కలిపారో దాన్ని నూటికి నూరుపాళ్ళు నెరవేర్చాయి. సినిమాలో ప్రతి పావుగంటకీ ఓ సారి వచ్చే ఇలాంటి సీన్స్ ఫ్యాన్స్ కి గూస్ బంప్స్ తెప్పించి ఎంటర్టైన్ చేస్తాయి. 

పింక్ చూడని వాళ్ళకోసం కథ టూకీగా చెప్పాలంటే. ఇంటికి దూరంగా ఓ అపార్ట్మెంట్ లో ఉంటూ పని చేస్కుంటున్న ముగ్గురు అమ్మాయిలు ఓ రాత్రి క్యాబ్ లో ప్రయాణిస్తుండగా హఠాత్తుగా అది చెడిపోతుంది.  కార్ డ్రైవర్ తో ఎక్కువ సేపు అక్కడ ఉండడం సేఫ్ కాదని వేరే క్యాబ్స్ ఏమీ దొరకకపోవడంతో దారిలో వెళ్తున్న ఓ కారుని లిఫ్ట్ కోసం ఆపుతారు. అందులో వీళ్ళకి పరిచయమున్న ఓ ఫ్రెండ్ కూడా ఉండడంతో ఆ కార్ లో వారితో పాటు వెళ్తారు. ఆ కారులో ఓ ఎం.పి. కొడుకు విశ్వ కూడా ఉంటాడు. కట్ చేస్తే విశ్వ తల పగిలి హాస్పటల్ లో చేరతాడు. తర్వాత అతను పల్లవి పై అటెంప్ట్ టు మర్డర్ కేస్ పెడతాడు. 

పల్లవి వాళ్ళుంటున్న ఇంటికి దగ్గరలో ఓ తాగుబోతు లాయర్ సత్యదేవ్(పవన్) ఉంటాడు. కోర్ట్ లో జడ్జ్ ఎదురుగానే ఒకరిపై దాడి చేసి బార్ కౌన్సిల్ తో నాలుగేళ్ళ పాటు సస్పెండ్ కాబడిన ఈ లాయర్ సస్పెన్షన్ ముగిసినా నేనే కోర్టుని సస్పెండ్ చేశానని చెప్తూ తిరిగి కోర్ట్ మెట్లెక్కకుండా మత్తులో మునిగి తేలుతుంటాడు. ఓపెన్ అండ్ షట్ కేస్ లాగ ఉన్న ఈ కేస్ నుండి పల్లవి అండ్ కో ని వకీల్ సాబ్ గా పిలవబడే ఈ లాయర్ సత్యదేవ్(పవన్) ఎలా కాపాడాడు, అసలు ఆ రిసార్ట్ లో ఆ రాత్రి ఏం జరిగింది అనేదే మిగిలిన కథ.    

తమ తప్పులేకుండా ఊహించని విధంగా ఆపదలో చిక్కుకున్న ముగ్గురు అమ్మాయిలుగా నివేథా, అంజలి, అనన్య ముగ్గురూ బాగా చేశారు మొదటి ఇద్దరికి కాస్తె ఎక్కువ స్క్రీన్ స్పేస్ ఉండడంతో వాళ్ళ పెర్ఫార్మెన్స్ బాగా కనపడింది. చాన్నాళ్ళ తర్వాత శరత్ బాబు గారిని చూడ్డం బావుంది. అలాగే జడ్జ్ గా చేసిన సినిమాటోగ్రాఫర్ మీర్ కూడా గుర్తుండి పోతారు. ప్రాసిక్యూటర్ గా ప్రకాష్ రాజ్ పవన్ కు సమ ఉజ్జీగా నిలిచారు. పవన్ తన యూజువల్ మానరిజమ్స్ ని పక్కన పెట్టి ఒక లాయర్ గా చాలా హుందాగా నటించాడు. తన పెర్ఫార్మెన్స్ పవర్ ఫుల్ గా కూడా చాలా బావుందీ సినిమాలో. తన పద్దతికి భిన్నంగా ఓ లాయర్ గా డిగ్నిఫైడ్ గా నటించాడు అక్కడే వకీల్ సాబ్ ఎక్కువ మార్కులు కొట్టేశాడు.  

సినిమా మొదటి సగం కాస్త నెమ్మదిగా నడిచినట్లు అనిపించినా రెండో సగం మాత్రం అద్యంతం గ్రిప్పింగ్ గా నడిచింది. కోర్ట్ రూం డ్రామాలు ఇంత ఎంగేజింగ్ గా నడపడం కష్టమైన పనే దాన్ని సులువుగా చేసేశారు దర్శకులు వేణూశ్రీరాం. ఐతే కోర్ట్ లో ఇంత ఆవేశాన్ని చూపించడం వాస్తవ దూరమనిపిస్తుంది కానీ పవర్ ఫుల్ సీన్స్ కోసం ఆ మాత్రం సినిమాటిక్ లిబర్టీ తీస్కోడం ఓకే అనిపిస్తుంది. ఇక తిరు తో కలిసి వేణుశ్రీరాం రాసుకున్న సంభాషణలు చాలా  బావున్నాయి కొన్ని హృదయాన్ని తాకి గుర్తుండి పోతాయి. ఒకటీ అరా పవన్ పొలిటికల్ మైలేజ్ కి ఉపయోగపడేలాంటి మాటలున్నా అవి ఎదుటివారిపై విమర్శలు కాకుండా తనని ఎలివేట్ చేసేవే రాసుకోవడం బావుంది. ఆ కొన్ని కూడా సినిమా కథలో కలిసిపోతూ ప్రత్యేకంగా ఫ్యాన్స్ కు మాత్రమే అర్ధమయేలా ఉన్నాయ్. 

టెక్నికల్ డిపార్ట్మెంట్ లో ముఖ్యంగా చెప్పుకోవలసింది థమన్ నేపధ్య సంగీతం గురించి. సినిమాకి టెక్నీషియన్ గా కన్నా ఓ పవన్ అభిమానిగానే పనిచేశాడనిపించింది. ఫైట్స్ ని కూడా తన మ్యూజిక్ తో ఎలివేట్ చేయగలిగాడు, ఇక కోర్ట్ సీన్స్ గురించైతే చెప్పక్కర్లేదు. అలాగే సినిమాటోగ్రఫీ కూడా బావుంది కోర్ట్ రూం లో ఆసక్తికరంగా తీయడం ఛాలెంజ్ అనే చెప్పాలి, దాన్ని విజయవంతంగా సాధించారు. నిర్మాణ విలువలు బావున్నాయ్. 

   

ఓవరాల్ గా వకీల్ సాబ్ పవన్ ఫ్యాన్స్ కి బ్లాక్ బస్టర్ మూవీ అనిపిస్తుంది, తమ హీరోని ఎలా ఐతే చూడాలని అనుకుంటారో అలా కనులపండగగా చూస్కోవచ్చు వెండి తెరపై. పింక్ సినిమా చూడని సగటు ప్రేక్షకులకి మంచి కథ ఉన్న సినిమా చూశామనిపిస్తుంది. ఇక పింక్ సినిమా వీరాభిమానులకి మాత్రం అమితాబ్ పాత్రని మార్చేశారని కోపం రావచ్చు. 

ఏదేమైనా తెలుగులో ఓ స్టార్ హీరో ఇలా కథాబలం ప్లస్ మంచి సందేశం ఉన్న సినిమా చేయడం అభినందించ వలసిన విషయం అండ్ ప్రతి ఒక్కరూ కూడా చూసి ప్రోత్సహించవలసిన విషయం. ఈ కాలం యువతకి ముఖ్యంగా ప్రతి అబ్బాయికీ చూపించాల్సిన సిన్మా ఇది,  మహిళల పట్ల అబ్బాయిల దృక్పధాన్ని మార్చే సినిమా వకీల్ సాబ్. ఈ సినిమాలో నాకు నచ్చిన సంభాషణలు మరో పోస్ట్ లో ఇక్కడ చూడవచ్చు.

ఈ సినిమాలోని కథని, దర్శకుడు చర్చించిన పాయింట్స్ నీ మరింత విపులంగా వివరిస్తూ బిబిసి తెలుగు కోసం సౌమ్య ఆలమూరు రాసిన రివ్యూ నాకు బాగా నచ్చింది మీరూ ఇక్కడ చదవవచ్చు. కొన్ని స్పాయిలర్స్ ఉండచ్చు ప్రిపేర్ అయి చదవండి. 

మొత్తం చదవండి