బెంగళూరు ఆటోల క్రమబద్దీకరణ కోసం ఇక్కడి ట్రాఫిక్ పోలీసులు ప్రవేశ పెట్టిన మరో అంశం డ్రైవర్ లైసెన్స్ ప్రదర్శన. ప్రతి ఆటోలోనూ ఇక్కడ ఫోటోలో చూపించినట్లు డ్రైవర్ పేరు, పోలీస్ స్టేషన్ పరిధి, లైసెన్సు నంబరు అన్నీ కలిపి సాధారణంగా డ్రైవర్ సీటు వెనకాల ప్రయాణీకుల కు స్పష్టంగా కనిపించేలా ప్రదర్శించాలి. విధిగా ప్రతి ఆటోలోనూ ప్రదర్శితమయ్యే ఈ వివరాలు ఆటో వాలాలని కాస్తైనా కంట్రోల్ లో ఉంచుతాయి అనుకుంటున్నాను. అంటే క్షణం క్షణం లో శ్రీదేవి ని దబాయించినట్లు ఆ లిఖ్ లో.. నంబర్ లిఖ్ లో.. కంప్లైంట్ కరో.. అని లెక్క లేకుండా మాటాడే వాడు తగిల్తే మనం ఏమీ చేయలేమనుకోండి అది వేరే విషయం..ఇక ఇక్కడి ఆటోలో నాకు అత్యంత కోపం తెప్పించే అంశం కుడి వైపు మలుపు తిరగాలి అని తెలిసినా కూడా మూడు లైన ల రోడ్ లో ఎడమ వైపు చివరి లైన్ లో ప్రయాణిస్తూ, హఠాత్తుగా సిగ్నల్ దగ్గరకు వచ్చే సరికి సర్రు మని ఈ చివరి నుండి ఆ చివరికి అడ్డగోలు గా నడిపి ఇతర చోదకులను ఖంగారు పెట్టి ప్రమాదాలకూ ట్రాఫిక్ జామ్ లకూ కారకులవుతారు. మొన్న ఒక రోజు ఇటువంటి సంధర్బం లోనే నేను ఒక కిలో మీటర్ ముందు నుండి డ్రైవర్ తో "బాబు వచ్చే సిగ్నల్ దగ్గర కుడి వైపు తిరగాలి..లైన్ మారు రైట్ లైన్ లోకి వెళ్ళు.." అని చెప్తూనే ఉన్నాను. అయినా అతను నా మాట లెక్క చేయకుండా సరిగా సిగ్నల్ నాలుగు అడుగుల లో ఉందనగా వాడి స్టైల్ లో అడ్డం గా తిప్పేసాడు. నాకు బాగా కోపం వచ్చి తిట్టేసాను. "ఏమోయ్ ఇందాకటి నుండీ చెప్తున్నాను అసలు బుర్రా బుద్దీ ఉన్నాయిటోయ్..." అని క్లాస్ మొదలు పెట్టేసరికి ఓ క్షణం తత్తర పడి లేదు సార్ అని చెప్పినా, మరు నిముషం లో అతను "లేదు సార్ ఇలాంటి పెద్ద రోడ్ లో మాలాటి చిన్న బళ్ళు నిదానంగా వెళ్ళే బళ్ళు ఎడమ వైపునే వెళ్ళాలి కుడివైపు నుండి వేగాంగా వెళ్ళే బండ్లు వెళ్తాయి !! అందుకని నేను చేసిందే కరెక్ట్..." అంటూ లాజిక్ తీసి వాదించడం మొదలు పెట్టాడు. నేను "సరే లేవోయ్ అన్నీ తెలిసినపుడు ఆఖరి నిముషం లో తత్తర పెట్టక ముందే లైన్ మారాలి తెలీదా అని గట్టిగా అరిచేసి వదిలేశా అనుకోండి అంతకన్నా ఏం చేస్తాం, ఎంత చెప్పినా వాడి చెవికెక్కుతుందా.
సరే ఇన్ని కష్టాలు పడుతూ ఆటోల లో ఎందుకు తిరగడం అంటారా... నాకెందుకో ఆటో లో ప్రయాణం చాలా నచ్చుతుంది... ట్ర్.ర్.ర్.ర్ మనే కర్ణ కఠోరమైన శబ్ధ కాలుష్యాన్ని భరించగల ఓపిక ఉండాలే కానీ... ఆటో ప్రయాణాన్ని చాలా బాగా ఆస్వాదించవచ్చు. వేగం పరం గా అయితేనేమీ, వాహన ఎత్తు పరంగా అయితే నేమీ, ఓపెన్ నెస్ పరంగా అయితేనేమీ, ఆటోలో వెళ్తుంటే నాకు ఇంచు మించు నడుస్తూ ఆయా వీధుల లో తిరుగుతున్న అనుభూతే కలుగుతుంది. కార్ కానీ బస్ కానీ మరే వాహనమైనా ఈ అనుభూతి దొరకదు, బైక్ దీనికి ఎక్సెప్షన్ అనుకోండి మరి మనకి అది వచ్చి చావదు కదా :-) అదీకాక హెబ్బాల్ ఓ కుగ్రామం లా ఉంటుందేమో ఇక్కడ ఒకో సారి రోడ్డు పక్కన గాడిదలు, గుర్రాలు, కొండొకచో ఒంటెలు కూడా కనపడి పలకరిస్తూ అలరిస్తూ ఉంటాయి. ఇక ఔటర్ రింగ్ రోడ్డు లో ప్రత్యేకించి నే ప్రయాణం చేసే హెన్నూరు, నాగవర సిగ్నల్స్ మధ్య రోడ్డుకు అటు ఇటు పచ్చని చెట్ల తో బోలెడు ఆహ్లాదకరంగా ఉంటుంది. కార్ లో క్షణం లో అయిపోయే ఈ స్ట్రెచ్ ని ఆటో లో చాలా చక్కగా ఎంజాయ్ చెయ్యచ్చు.
ఈ ఉల్లిపాయ సమోసాలనీ వాటిని కట్టి పడేసిన దారాన్నీ గమనించారా.. ఇటువంటి వరుసలు 5-6 వరకు ఒకదానిపై ఒకటి పేర్చి కేవలం దారం తో, అవి పడి పోకుండా ఓ కోట కట్టి సిగ్నల్ దగ్గర అమ్ముతూ ఉంటారు. అద్భుతమైన ఫీట్ కదూ !! అసలు పావ్ బాజీ లూ, పానీ పూరీలు, ఛాట్ మసాలాలు ఎన్ని వచ్చినా ఈ ఉల్లిపాయ సమోసా కి సాటి రావేమో అని అనిపిస్తుంది నాకైతే, కాదనే వారెవరైనా ఉన్నారా ?? ఇక ఆటో ప్రయాణం లో మరో పదనిస సిగ్నల్స్ దగ్గర కనిపించే రక రకాల వ్యక్తులు. సింటెక్స్ వాటర్ ట్యాంక్ షేప్ లో ఉండే కిడ్డీ బ్యాంక్ లు, కర్చీఫ్ లు, జామ కాయలు, కార్ క్లీనింగ్ కి వాడే క్లాత్ లు, వార్తా పత్రికలు, చిన్న చిన్న బొమ్మలు, బాల్స్ ఇత్యాదులు అమ్మే వాళ్ళు వీళ్ళ లో ఒక వర్గం. వీళ్లలో కొందరు రియల్ క్రియేటివ్ బిజినెస్ పీపుల్ ఉంటారు, అసలు వీళ్ళ దగ్గర బోల్డు బిజినెస్ టాక్టిక్స్ నేర్చుకోవచ్చు నేమో అనిపిస్తుంది. కొందరు పిల్లలు ఇలా అమ్ముతూ ఈ పని లోనే రిక్రియేషన్ కూడా కవర్ చేస్తారు. ఒక పిల్లాడు ఆగి ఉన్న కార్ సైడ్ అద్దం లో క్రాఫ్ సరిచేసుకుంటే మరొకడు మూసి ఉన్న విండో గ్లాస్ లో మొహం చూసుకుంటూ రక రకాల హావభావాలు ప్రదర్శిస్తూ కార్ లోపలి వాళ్ళని కూడా ఎంటర్ టైన్ చేస్తూ ఉంటాడు. కారుల్లో వాడు అద్దాలు ఎత్తేసి వీళ్ళ దగ్గర నుండి తప్పించుకున్నా ఆటో లో ఉంటే వీరి భారిన పడక తప్పదు. మొన్నొక రోజు ఇలానే ఆటో ఆగి ఉంటే ఒకమ్మయ్ వచ్చింది నన్ను చూడగానే తెలుగు వాడ్ని అని ఎలా తెల్సుకుందో లేదా అందరితో తెలుగు లోనే మాటాడుతుందో తెలీదు కానీ "అన్నా పిల్లలకి బంతి కొను అన్నా... పిల్లలకి, ఆడుకోడానికి రంగురంగులుగా, మెత్తగా బాగుంటుంది అన్నా..కొనన్నా అని మొదలు పెట్టింది. నిజం చెప్పొద్దూ పిల్లలు, బంతి సంగతి ఎలా ఉన్నా అంకుల్ అనకుండా అన్నా అన్నందుకైనా కొనచ్చేమో అని ఓ క్షణం అనిపించింది :-) సరే ఏదైనా ఇప్పుడు నీ బొమ్మలు కొనడానికి అర్జెంట్ గా పెళ్ళి చేసుకుని పిల్లల్ని కనడం సాధ్యం కాదు లే ఫో అని చెప్పి పంపించేశా..
ఇక ఆటో ప్రయాణం లో విసిగించే మరో బ్యాచ్ హిజ్డాలు, ఒకప్పుడు బెంగళూరు నుండి గుంటూరు కు ప్రశాంతి లో ప్రయాణం చేయాలంటే నాకు చాలా టెన్షన్, ఎందుకంటే ఆ ట్రైన్ మధ్యాహ్నం బయలు దేరుతుంది బెంగళూరు నుండి, అందులో వీళ్ళు అడుక్కోడానికి వచ్చి ఐదో, పదో ఇస్తే తప్ప కదిలే వారు కాదు నానా యాగీ చేశేవారు. ఎప్పుడైనా నిజంగా చిల్లర లేకపోయినా వీళ్ళ భారిన పడక తప్పేది కాదు. వీళ్లకి భయ పడి అప్పట్లో ప్రయాణానికి సిద్దమయ్యేప్పుడు ముందుగా చిల్లర సిద్దంగా పెట్టుకునే వాడ్ని. ఇప్పుడు ఔటర్ రింగ్ రోడ్ లో బనసవాడి, హెబ్బాళ్ మధ్య లో సిగ్నల్స్ దగ్గర వీళ్ళు వచ్చి డబ్బులు అడుగుతుంటారు. కాకపోతే వీళ్ళు ఎక్కువగా సతాయించరు అడిగి ఇస్తే తీసుకు వెళ్తారు లేదంటే లేదు అంతే.. ఒక సిగ్నల్ దగ్గర ఒకళ్ళకంటే ఇవ్వచ్చు కానీ ప్రతి సిగ్నల్ లోనూ అంటే మనకైనా విసుగొస్తుంది.
సరే ఇప్పటికే చాలా పెద్ద టపా అయినట్లుంది. చివరగా మొన్న పన్నెండో తారీఖు ఈనాడు ఆదివారం ప్రత్యేక సంచిక లో ప్రచురించిన చిన్న వ్యాసం గురించి ప్రస్తావించి ముగిస్తాను. ఆటోలకీ అద్భుతమైన ఫాన్స్ ఉన్నారు అని ఈ వ్యాసం నిరూపిస్తుంది. విదేశీయులతో అటోలో భారత యాత్ర చేస్తూ సేవా కార్యక్రమాలని కూడా చేస్తున్న అరవింద్ గారి గురించి తెలుసుకోవాలంటే, పైనున్న బొమ్మ పై క్లిక్ చేసి వ్యాసం చదవండి.
*~*~*~*~*~*~*~*~*~*~*~*~*~*~*~*~*~*~*~*~*~*~*~*~*~*~*
ఈ టపా ప్రచురించిన కొన్ని గంటలలో ఇపుడే ఈ ముంబయి ఆటోవాలా గురించి చదివి ఆశ్చర్య పోయాను. ఇతని ఆటోలో ఫస్ట్ ఎయిడ్, టీవీ, పత్రికలు, ఫ్యాన్ లాటి సౌకర్యాలు కల్పించడం ఒక ఎత్తైతే, ఇతని ఆటోలో వికలాంగులకు ఇరవై ఐదు శాతం తగ్గింపు, అంధులకు యాభై రూపాయలవరకూ ఉచిత ప్రయాణ సౌకర్యం లాంటి వివరాలు విని నాకు నోట మాట రాలేదు. ఈ రియల్ హీరో గురించి పూర్తిగా చదవాలంటే ఈ లింక్ చూడండి. ఈ అసక్తికరమైన ఈ మెయిల్ ను నాకు ఫార్వార్డ్ చేసిన నేస్తానికి బ్లాగ్ ముఖంగా ధన్యవాదాలు.
*~*~*~*~*~*~*~*~*~*~*~*~*~*~*~*~*~*~*~*~*~*~*~*~*~*~*
'ట్రాఫిక్ సిగ్నల్' సినిమా మళ్ళీ చూసిన అనుభూతి.. నేను హైదరాబాద్ లో ఆటో లో ప్రయాణిస్తే నా దృష్టి అంతా మీటర్ మీదే ఉంటుంది.. భలే జంప్ అవుతూ ఉంటుంది లెండి.. ఒకే దూరానికి ఏ రెండు సార్లు ఒకే మొత్తం చూపించలేదు.. 'అన్నా..' అనిపించుకున్నందుకైనా బంతి కొనేందుకు ప్రయత్నాలు ప్రారంభించండి మరి :-) :-)
రిప్లయితొలగించండిబాగున్నాయి మీ ఆటో అనుభవాలు.
రిప్లయితొలగించండిహిజ్డా ల బాధ చాలా పెద్దది. ఈ మధ్యనే పోలీసులో, ఎవరో సీరియస్ గా ఈ సమస్యను పరిష్కరించినటున్నారు.
రిప్లయితొలగించండిమురళి గారు నెనర్లు. మరే ప్రయత్నాలు ప్రారంభించాలండీ.. తప్పకుండా...
రిప్లయితొలగించండిపద్మార్పిత గారు నెనర్లు.
రవి గారు నెనర్లు. ఓ అవునా బహుశా ఆ పోలీసుల చొరవ వల్లే కామోసు ఉధృతి తగ్గింది.
బెంగళూరు ఆటోల గురించి ఎంత మాట్లాడుకున్నా తక్కువే :(
రిప్లయితొలగించండిగత వారం ఒక ఆటో వాలా నాకు పగలే చుక్కలు చూపించాడు. స్లో గా వెళ్తావా లేదా ఆటో దిగేయమంటావా అంటే కాని తగ్గలేదు.
ఇక మీటర్ అంటారా ఆటో చక్రం కన్నా వేగంగా తిరుగుతుంది
లైసెన్స్ పెట్టుకున్న వాళ్ళు ఎంత మందున్నారో, పెట్టుకోని వాళ్ళు అంతమంది ఉన్నారు!!
రిప్లయితొలగించండిసమోసా ఫీట్ మాత్రం భలే! అలా ఎలా చేస్తారో..
ఇక మీటర్ల గురించి ఎంత తక్కువ మాట్లాడుకుంటే అంత మంచిదేమో..!!
BTW, నాకూ ఆటో ప్రయాణం నచ్చుతుంది.. ఈ ట్రాఫిక్ లో, బైక్ మీద నడుంనొప్పితో బాదపడకుండా, బస్ లాగా అన్నిచోట్లా ఆపకుండా, కార్ లాగా ఝామ్మని దూసుకుపోకుండా... ఇలా చాలా "లా" బావుంటుంది!!
నెనర్లు చైతన్య గారు, నిజమే వేగం విషయం లో కొందరు మరీ దూకుడుగా ఉంటారు.
రిప్లయితొలగించండినెనర్లు మేధ గారు, నేను బస్ స్టాండ్, స్టేషన్ దగ్గర ఉండే మీటర్లు కూడా లేని/పనిచేయని ఆటోల లో తప్పించి సాధారణ ఆటోలన్నిటి లోనూ ఈ లైసెన్స్ గమనించానండీ...
ఐ..మనవి అన్నీ ఒకటే టేస్టులు...ః))..నాకూ ఆటో తప్ప ఏ వాహనం ఎక్కినా తల తిప్పేసిద్ది..డోక్కుంటూ కూర్చోటమే.ఎంత లక్సరీ కారైతే అంత ఎక్కువ డోకన్నమాట!
రిప్లయితొలగించండికాని మా గుంటూరు ఆటొ వాళ్ళు చాలా బెటరు! మనకి డిస్టెన్సు తెలుసు కాబట్టి ముందే బేరం ఆడి ఎక్కటమే! పైగా ఇరవైనాలుగ్గంటలూ షేర్ సర్వీసు ఉంటది..కాబట్టి అస్సలు ఇబ్బందే లేదు...
బైకు దీనికి ఎక్సెప్షననుకోండి..కానీ నాదీ మీ కండీషనే..డ్రైవింగ్ రాదుగా..కారు వచ్చినా తోలాలో, డోక్కోవాలో అర్థంకాక ఎక్కువశాతం ఆటోనే ప్రిఫర్ చేస్తుంటా!
ఇక హైదరాబాదులో ఆటో ఎక్కామంటే నరకమే! ఏ ఇద్దరి మీటర్లూ ఒకలా ఉండవు...అడిగితే దబాయిస్తారు..ఒక్కోడూ దున్నలల్లే ఉంటారాయే!..మనమేం మాటాడతాం...కొంతమంది మాత్రం చాలా సరదాగా,నిజాయితీగా ఉంటారు...ఈ మధ్య కొత్త టెక్నిక్ కనిపెట్టారు..ఎక్కువదూరం బాడుగ అడిగితే మీటర్ మీద ఒక ఐదు రూపాయలు ఎక్కువ చెప్పి,మీటర్ వెయ్యరు..మనం పోన్లే అనుకుంటాం...కొద్ది దూరం తీసుకెళ్ళి,ఆటొ పాడయ్యిందని షో చేసి, సగం కన్నా ఎక్కువ డబ్బులు డిమాండ్ చేసి లాగుతారు....ఇక మన తర్వాత తిప్పలు దేవుడికెరుక!!!
కౌటిల్య గారు నెనర్లు,
రిప్లయితొలగించండిహ హ మనవి ఒకే టేస్టులు అని తెలుసుకోవడం సంతోషంగా ఉందండి. మన గుంటూరు అనండి సార్ :-) మాది కూడా గుంటూరే, నిజమే గుంటూరు ఆటోలు హాయనిపిస్తాయి. హైదరాబాద్ ఆటోలతో నాకట్టే అనుభవం లేదులెండి.